Parchu’r Cod Cefn Gwlad
Wrth gwblhau Her y Tri Chopa ac archwilio’r Wyddfa a’r ardaloedd cyfagos, mae’n hanfodol dilyn y Cod Cefn Gwlad i helpu i ddiogelu’r amgylchedd a’r cymunedau gwledig. Mae llawer o’r llwybrau i’r copa yn mynd trwy dir fferm gweithredol, felly mae’n bwysig bod yn ymwybodol o, a pharchu cefn gwlad a’r trigolion.
Ydych chi’n dod â’ch ci?
- Cadwch eich ci dan reolaeth bob amser: Sicrhewch fod eich ci yn aros ar y llwybr ac nad yw’n tarfu ar fywyd gwyllt na da byw.
- Cadw cŵn ar dennyn: Yn enwedig yng nghyffiniau da byw, bywyd gwyllt, ac yn ystod y tymor bridio adar. Ar dir mynediad agored (sy’n cynnwys yr Wyddfa gyfan), rhaid i gŵn fod ar dennyn rhwng 1 Mawrth a 31 Gorffennaf i amddiffyn adar sy’n nythu ar y ddaear.
- Parchwch arwyddion lleol: Gwiriwch am gyfyngiadau cŵn penodol i’r ardal rydych chi’n ymweld â hi.
- Glanhewch ar ôl eich ci: Rhaid i wastraff cŵn bob amser gael ei fagio a’i waredu mewn bin cyhoeddus neu dylech fynd ag o adref. Argymhellir bagiau bioddiraddadwy. Peidiwch â gadael bagiau gwastraff ar ôl o dan unrhyw amgylchiadau.
- Byddwch yn ofalus yng nghyffiniau da byw: Os ydych chi’n teimlo dan fygythiad gan anifeiliaid, gollyngwch eich ci oddi ar y tennyn i sicrhau eich diogelwch.
Gwersylla yn Eryri
Os ydych chi’n bwriadu aros dros nos ar ôl eich her, i gael y profiad gwersylla gorau yn y parc, gwnewch yn siŵr eich bod chi’n:
- Aros mewn gwersyll swyddogol – mwy o wybodaeth yma.
- Archebwch eich lle ymhell ymlaen llaw
- Cynlluniwch eich taith i’r gwersyll, gan fod rhai ardaloedd yn gallu bod yn brysur iawn yn ystod y tymhorau brig
Gwaherddir gwersylla gwyllt yn llym ledled Eryri heb ganiatâd ymlaen llaw gan y tirfeddiannwr neu’r ffermwr. Mae hyn yn cynnwys Yr Wyddfa. Ni chaniateir gwersylla mewn meysydd parcio, ar ymylon y ffordd, na chysgu dros nos mewn cerbydau ar unrhyw adeg.
Tanau agored
Gwaherddir tanau agored a thannau mewn basgedi ar y mynydd yn gyfan gwbl. Mae hyn er mwyn diogelu’r amgylchedd sensitif, atal tanau gwyllt, a sicrhau diogelwch yr holl ymwelwyr. Gall fflamau agored ledaenu’n gyflym mewn amodau sych, gan beri bygythiad difrifol i fywyd gwyllt, llystyfiant, a’r dirwedd – gan gynnwys adeilad y rheilffordd a’r caffi. Maent hefyd yn cyflwyno risgiau sylweddol i bobl yn yr ardal. Er mwyn i chi gael ymweliad diogel a phleserus, peidiwch â chynnau tân a pharchwch yr amgylchedd naturiol bob amser.
Llygredd sŵn a golau
I’r rhai sy’n ymgymryd â’r her o esgyn i fyny neu i lawr Yr Wyddfa yn ystod y nos, dylech gofio a bod yn ystyriol o’r trigolion lleol sy’n byw ger y llwybrau mynydd. I leihau aflonyddu arnynt, cofiwch fod yn ddistaw a defnyddio cyn lleied â phosib o oleuadau.
Mae’r Wyddfa yn gorwedd o fewn Gwarchodfa Awyr Dywyll ddynodedig, ardal a warchodir am ei gwelededd eithriadol yn yr awyr nos. Pan fyddwch chi’n defnyddio lampau / goleuadau pen neu oleuadau eraill, diffoddwch nhw pan nad ydynt yn cael eu defnyddio – yn enwedig gerllaw cartrefi – i leihau llygredd golau. Bydd eich agwedd ystyriol yn helpu i warchod heddwch a harddwch naturiol yr ardal i bawb ei fwynhau.
Ysbwriel
Gan mai’r Wyddfa yn aml yw stop olaf yn Her y Tri Chopa, weithiau byddwn yn dod ar draws llawer iawn o sbwriel sydd wedi’i adael ar ôl cyn i bobl fynd adref. Helpwch ni i gadw’r mynydd yn lân trwy fynd â’ch holl sbwriel hefo chi – gan gynnwys gwastraff bwyd fel croen oren, creiddiau afalau, bagiau te, a chroen banana. Gwaredwch â rhain yn gyfrifol adref, yn eich biniau lleol a’ch cyfleusterau gwastraff.
Yn ogystal, mae gwaharddiad llym yn erbyn lansio balŵns neu lusernau er mwyn diogelu’r amgylchedd
Defnyddio dronau
Defnyddio dronau at ddibenion anfasnachol
Mae’r Awdurdod Hedfan Sifil (a adwaenir yn gryno fel y CAA) wedi nodi cyfrifoldebau cyfreithiol y mae’n rhaid i bob defnyddiwr drôn eu dilyn. Am ragor o wybodaeth am ddefnyddio dronau ar Yr Wyddfa, ewch i weld gwefan Parc Cenedlaethol Eryri yma.
Yr Wyddfa Ddi-blastig
Mae Parc Cenedlaethol Eryri a Phartneriaeth Yr Wyddfa yn gweithio tuag at wneud Yr Wyddfa y mynydd di-blastig cyntaf yn y byd. Meddyliwch yn ofalus am yr hyn rydych chi’n dod â chi gyda chi, a gwnewch yn siŵr eich bod chi’n mynd â’ch holl sbwriel adref.
I gael rhagor o wybodaeth am sut y gallwch ein helpu i gyflawni’r nod hwn, ewch i weld tudalen Yr Wyddfa Ddi-blastig ar wefan Parc Cenedlaethol Eryri.